<

原创张珑海上梦叠

作者：张珑

来源：上海学.10.13

上海话改写：郭莉

文字修正：丁迪蒙

讲述：顾敏

我年中西女中毕业，考进上海圣约翰大学英文系。圣约翰大学勒上海兆丰公园，就是现在中山公园后头个苏州河边浪，占地亩，横跨苏州河两岸。

从历史沿革来讲，年美国基督教圣公会成立了圣约翰书院，年又增设了大学部，慢慢叫发展成为具有文、理、工、医等等学院个圣约翰大学。

当年上海教会大学里向，圣约翰大学是最早个，也是最有名望个，甚至有得“东方哈佛”个美誉。阿拉侪亲切个叫伊“约大”。校训中文是“学而不思则罔，思而不学则殆”，以及英文“LightTruth”意思是“光与真理”。我搭“中西女中”好几个同学侪考进了约大了，所以，开始辰光总归要拿约大跟中西女中做比较，觉着约大校园勿及中西美，卫生勿及中西好，管理勿及中西严。

其实，约大校舍更加显得古老。伊有邪气漂亮个、高低起伏个大片草地，还有一棵老樟树，枝繁叶茂，树枝朝四边伸展出去，又落到地浪，再从土里向长出新个枝叶，所以伊个绿荫覆盖足有几十平方米介大，可以讲是约大校园里最突出个标志性景观。

伊歇辰光，绝大多数学生侪是走读，所以学堂呒没为全校学生提供宿舍个麻烦，招生也勿受宿舍容量个限制。我从淮海路个屋里到约大，每日天先乘车到兆丰公园，再从公园前门穿到后门，出去就是约大个正门了。所以学生常年侪买公园月票个。有个阶段学堂里有校车，我可以一早蹲勒附近路口等校车，直达学堂，搿能就方便仔交关。再后来，我就踏脚踏车了。

校园个外头有交关小饭店，侪做约大学生个生意。要是下半日有课，阿拉就勒小饭店里向吃中饭。一顿饭只要几角洋钿。有家无锡人开个饭店，有道菜叫“糖牛肉”，真个是一盘甜甜个糖炒牛肉丝，迭个“无锡风味”实在是甜到家了呀！有段辰光到中浪向，就有个做小生意个小车子，卖西式面包夹色拉，小车子装有玻璃橱，看看也清爽，一份面包只要一两角洋钿，一记头就成为了学生仔个新宠。还有眼辰光，大家穿过兆丰公园，到公园外头个一家小饭店里吃蛋炒饭，吃好再穿公园回到学堂。

圣约翰大学一两年级侪是基础课，有中文、世界史、英文作文等等。三四年级就侪是专业课了，有英国诗歌、戏剧、小说、莎士比亚、英美文学史、应用文写作等等。到了四年级，除脱仔课程，还要写篇论文。

约大个教学理念、教学风格，跟中西女中基本是一脉相承个，侪是鼓励学生主动学习、自由发挥、自由创造。做选择题个办法仅仅是考试辰光采用。题量大得勿得了，常庄是一个钟头里向要填道选择题，侬根本呒没辰光去思考。目的是用来测验学生个知识积累是否丰富。现在个中学英语课侪是用选择题作为练习，其实搿能根本勿可能培养学生英语运用能力个。至于作文课，就是要求学生自由发挥。记得我曾经写过个体裁有得短篇小说、独幕剧、论述文咾啥，老师只规定体裁，题材一般侪是自家选个。也有老师出只邪气灵活个题目，搭学生留出广泛发挥个空间。我四年级论文写个是关于莎士比亚十四行诗里向对自然景色个描述。

凡是有独创性个物事，侪会受到老师个赞赏。上课之外大家有交关辰光侪是泡勒图书馆里向，广泛个阅览各种跟自家个课程有关或者无关个书籍。课余饭后，同学侪欢喜三三两两坐勒斐蔚堂外头个大草地浪，或者坐勒伊棵大樟树个树荫下头个伊眼摇发摇发个、有得弹性个树枝浪。

大学一年级教中文课个是王辛白老师，还有位中文老师蔡正华年事已高，伊还曾经是我爸爸个老师唻。中文课学个侪是古典文学。除脱中文课，其他老师讲课搭仔学生记笔记，就侪用英文进行了。

教世界史个是罗博茨教授，是美国人，小矮子，伊是约大相当资深个教授。教英美诗歌个是美国教授福克斯女士，伊勒两战辰光做过战地护士。教英国小说个是美国人苏武德教授，教英国戏剧个是威利先生，伊勿是美国教会个，是从英国文化协会过来个。除脱仔戏剧，伊还教过门选修个辩论课，就是甲乙两方学生用英文针对一只问题，勒课堂浪进行辩论。题目是老师临时出个，学生事先呒没准备。迭个是种邪气好个训练，但是难度也是邪气大个。

讲述者：顾敏

原标题：《圣约翰大学（上）》


转载请注明地址:http://www.shengyuehana.com/syhjj/12977.html