《从上海言话看上海男人（上）》

撰稿：钱乃荣

朗读：钱乃荣

特别链接：

海派淮海路（上）上海话—钱乃荣稿，朱贞淼读

海派淮海路（下）上海话—钱乃荣稿，朱贞淼读

小乐惠辣八仙桥（上海话）—钱乃荣稿，朱贞淼读

从上海言话看上海女人（上）上海话—钱乃荣稿，钱乃荣读

留辣上海话当中个表现上海人特点个词语，已经成为上海人个生活习惯脱仔优良传统，同时也构成了以商业为基础个、脱农业文化勿一样个海派文化个底蕴。上海言话里向有点词语也记下来了上海男人个形象。

上海男人辣辣繁忙个处世办事辰光除脱仔养成了“门槛精（精明）”个内质以外，从外表来看还有“落落大方”个绅士风度个一面，讲究“派头”脱仔“气质”，“坐得正，立得稳”，心胸开阔，襟怀坦白，勿辣小事体浪向斤斤计较。碰着一眼朋友或者同事为难个事体，常常讲一句老轻松个言话：“小开司（case，小事一桩）”“噢，小开司，交拨我办好唻！”帮别人个忙解决问题看成功是“毛毛雨，小意思”，“小菜一碟（小意思，很容易）”，勿足挂齿。

老早上海个白领先生，有两种出身，一种是从“学徒”磨起个“苦出身”，还有一种是留洋回来个富家子弟，伊拉讲究“裤缝笔挺，皮鞋擦得锃锃亮”，“头子活络，卖相登样”，过“风风光光”个“写字间”生涯。有交关城市里向，也有工厂老板，也有个是劳苦大众，但是勿能够发展成为像上海介一度是世界商业金融中心个大都会，就是因为缺少搿能样子个一大群上海男人。

上海个大男人里向，存在辣海搿能样子一个重要个“白领”阶层，是上海商业化经济个支柱。伊拉讲究仪态，举止温文，一副“知书达理”个样子，侪有个人业余爱好，充满好奇告憧憬，具有创造力告能耐力，过明快炽热个生活，“有台型”，往往是一种细腻而富有风情个形象。尤其是搿眼见多识广、热爱西方文化、有国际视野个人，拨人家个感觉是温馨而又“洋派”，“交关克拉”。更有资深甚者，称为“老克拉”。

上海言话里“老克拉”搿个词，脱海派经济告海派文化直接有关，探索伊个来源，“克拉”来自英语“carat”，是宝石个重量单位，一克拉等于毫克。辣辣过去个珠宝店里向，老司务碰着三克拉以上成色个钻石宝戒，常常会大拇指一翘，称伊一声“老克拉”。后来用伊主要比喻搿眼有现代意识个、有西方文化学识背景个、有绅士风范个“老白领”，有个是从国外归来见过世面个，有个是上海外国人办个学堂里譬如圣约翰大学毕业个。再从伊拉个文化追求脱生活方式着眼，又延伸了从英语“colour”（彩色）脱仔“classics”（经典）两个词语来个特色含义。搿个阶层收入高，消费也比较前卫，讲究服饰告休闲个摩登，辣休闲方式浪向也领潮流之先，精通上海中西融合个时尚，追潮恰如其份。

后来又扩指到遇事在行、处世老练、有生活经验、有绅士风度个年长者，伊拉信口讲来，侪是典故。譬如：“我想告?介绍，搿两位上海滩浪个老克拉，上海三四十年代个事体，可以问问伊拉。”解放以后，辣全民侪穿中山装个年代，“老克拉”却穿出海派西装，辣大家普唱革命歌个辰光，伊拉戒勿脱老习惯去“打落弹（桌球）”、“跳蓬拆拆（交谊舞）”，有人就认为伊拉搞“资产阶级个香风臭气”。因为逆潮而动，一时“老克拉”便成为贬义词。

不过“六十年风水轮流转”，上海现在又走辣市场经济、知识经济个前哨了，“老克拉”又开始“吃香”了，精通中外时尚告技术个白领辣辣上海又壮大起来。伊拉脱一点老板一道又成为成功男士，拨拉大家赞誉为“积优股”脱“潜力股”。

即使辣辣外头是个“大户”，辣辣屋里向还是交关“做人家（节俭）”个上海人交关多，“一块洋钿掰两半用。”搿个恰恰是上海男人理性理财个优点。伊拉主张“自靠自”个自力更生，“爷有娘有勿如自家有”，伊拉勿啃老，勿仰人鼻息，也勿盲目“掼派头”，装大自吹“摆魁劲”，同时伊拉处事也实事求是，“勿摆丹老”使人上当。

当年辣辣上海交关大型个工厂车间里，侪有一点技艺精致、老练一流、会解决各种生产浪向疑难杂症个老工人老技师，伊拉个工作作风邪气严谨踏实，伊拉对生产个技术熟门熟路、严格把关，上海话里向称伊拉为“老法师”、“老家生”，伊拉是上海工厂个“宝贵财富”，有力个支撑了上海当年轻工业产品个高质品牌。

上海更加多个男人属于普通市民阶层。伊拉有个特点是十分“顾家”，多数人可以临时或者长期担任“马大嫂（买汏烧，家务活）”，屋里小修小补，是样样“来三”个“三脚猫”，拨人戏称为“家庭妇男”。对老婆也是“一帖药（完全顺从）”，甚至拿老婆供为“玉皇大帝”，言听计从。

上海言话里向个“花头经透”、“花露水足”往往勿用辣“资深美女”“熟女”浪个，而是“资深男人”个法宝，伊拉对老婆“有花功”，往往“软硬功夫”侪会，温柔体贴，乐于做“居家好男人”。有个人虽然襟怀还勿够开阔，但是多数勿会“拆烂污”，勿夸夸其谈“牛皮吹来野豁豁”，“侃”搿个词辣上海话词典中呒没同义词。但是伊拉要面子，要“扎台型”，脱别人“别苗头”，勿能“退招势”，就是“吃泡饭”也要“着挺括”，要“上台面”，要“卖相”，注意自家个“身价”勿好落脱，过去有一个词语叫“洋装瘪三”，讲个是即使“穷得溚溚渧”，外出一套“洋装”还是必备个。勿管是啥人，对“上只角”社区个情调告氛围侪是普遍认同个。

上海大男人个特点，是心胸开阔，目光前卫，工作勤奋，守信用讲规则，搿个是脱搿个海派都市海纳百川个胸襟告“上海速度”相和谐个。脱“上海大男人”相对个称谓是“上海小男人”，往往是指缺乏气概个、精于小事、目光短浅个搿眼上海男人。

文章来源：吳越小豬







































复方驱虫斑鸠菊丸治疗白癜风
北京最权威看白癜风医院